ਵਿਵਾਦਤ ਬਿਆਨ ਕੁਮਾਰਸਵਾਮੀ ਵੱਲੋਂ ਮੁਆਫੀ ਮੰਗਣ ਤੋਂ ਨਾਂਹ

ਬੰਗਲੌਰ – ‘ਬੇਰਹਿਮੀ ਨਾਲ ਗੋਲੀ ਮਾਰਨ’ ਦੇ ਦਿੱਤੇ ਬਿਆਨ ਤੋਂ ਪੈਦਾ ਹੋਏ ਵਿਵਾਦ ਮਗਰੋਂ ਕਰਨਾਟਕ ਦੇ ਮੁੱਖ ਮੰਤਰੀ ਐਚ ਡੀ ਕੁਮਾਰਸਵਾਮੀ ਨੇ ਮੁਆਫ਼ੀ ਮੰਗਣ ਤੋਂ ਇਨਕਾਰ ਕਰ ਦਿੱਤਾ ਹੈ। ਵਿਰੋਧੀ ਧਿਰ ਦੀ ਮੰਗ ਨੂੰ ਦਰਕਿਨਾਰ ਕਰਦਿਆਂ ਉਨ੍ਹਾਂ ਕਿਹਾ ਕਿ ਉਹ ‘ਭਾਵੁਕ ਇਨਸਾਨ’ ਹਨ। ਜ਼ਿਕਰਯੋਗ ਹੈ ਕਿ ਮਾਂਡਿਆ ਜ਼ਿਲ੍ਹੇ ’ਚ ਸੋਮਵਾਰ ਨੂੰ ਜਨਤਾ ਦਲ (ਐਸ) ਦੇ ਵਰਕਰ ਪ੍ਰਕਾਸ਼ ਦੀ ਹੱਤਿਆ ਮਗਰੋਂ ਟੈਲੀਫੋਨ ਰਾਹੀਂ ਦਿੱਤੇ ਨਿਰਦੇਸ਼ਾਂ ਦੇ ਵਾਇਰਲ ਹੋਣ ਕਾਰਨ ਕੁਮਾਰਸਵਾਮੀ ਵਿਵਾਦਾਂ ’ਚ ਆ ਗਏ ਸਨ। ਵਿਵਾਦਤ ਬਿਆਨ ਸਬੰਧੀ ਸਫ਼ਾਈ ਦੇਣ ਮਗਰੋਂ ਕੁਮਾਰਸਵਾਮੀ ਨੇ ਕਿਹਾ ਕਿ ਇਹ ਕੋਈ ਵੱਡਾ ਮੁੱਦਾ ਨਹੀਂ ਹੈ। ‘ਇਹ ਤਾਂ ਮਨੁੱਖੀ ਵਿਵਹਾਰ ਹੈ ਅਤੇ ਅਜਿਹੇ ਹਾਲਾਤ ’ਚ ਕੋਈ ਵੀ ਬੰਦਾ ਇੰਜ ਦੇ ਹੀ ਪ੍ਰਤੀਕਰਮ ਦੇਵੇਗਾ।’ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਉਨ੍ਹਾਂ ਕਿਹਾ ਕਿ ਜੇਕਰ ਕੋਈ ਵੀ ਨਾਗਰਿਕ ਮੁਸ਼ਕਲ ’ਚ ਹੋਵੇਗਾ ਤਾਂ ਉਹ ਅਜਿਹਾ ਹੀ ਵਤੀਰਾ ਅਪਣਾਉਣਗੇ। ਗ਼ੈਰਜ਼ਿੰਮੇਵਾਰਾਨਾ ਬਿਆਨ ਦੇਣ ’ਤੇ ਭਾਜਪਾ ਸੂਬਾ ਪ੍ਰਧਾਨ ਅਤੇ ਵਿਧਾਨ ਸਭਾ ’ਚ ਵਿਰੋਧੀ ਧਿਰ ਦੇ ਆਗੂ ਬੀ ਐਸ ਯੇਡੀਯੁਰੱਪਾ ਨੇ ਮੰਗ ਕੀਤੀ ਕਿ ਮੁੱਖ ਮੰਤਰੀ ਲੋਕਾਂ ਤੋਂ ਮੁਆਫ਼ੀ ਮੰਗਣ।